De Countdown lauft – morn gahts loos, ab uf Jublantis!

Sunntig, 06.10

Jubla am Irchel und Jubla Thalwil händ sich im Züri HB troffe – zämme sind mir den uf Ebnat-Kappel gfahre. Oder besser gseit uf Jublantis, wo mer vo de Meeresbewohner herzlichst empfange worde sind. Uf de (lange) fahrt hemmer eus schomal e chli kennelerne chönne. Det, i de Ortschaft hemmer den Zmittag gesse und es Stadtgame gspilt. Dadefür hemmer in Gruppe verschideni Challenges bewältiget – das isch echt cool gsi! Später, im Huus aacho, simmer zerst emal in eusi Zimmer iteilt worde, wo mir eus in Rueh iigrichted hend. Zum Znacht het eusi chuchi en feine Spaghettiplausch vorbereitet! Guet gstärkt hemmer eus eigentlich welle uf de Heiwäg, zrugg zu de Menschewält. Aber oh nei! De Hebel zum magische Portal isch abbroche!! Als ersti Maasnahm zum daabliibe hemmer eus im ne Schmuggelgame Luft müsse erarbeite. Tot müed aber glücklich simmer den nachher is Bett gheit.

Määntig, 07.10

Hüt Morge sind mir alli früeh wach gsii – d uufregig! Am 8i hemmer denn Zmorge gesse und zum de drü weise vo Jublantis, em Seestern, em Blauwal und de Qualle, bewiise, das mirs verdient händ daa z sii, sind mer den am Morge use und hend e spezial sportolympiade abgliferet! Zum Glück het d chuchi scho backed popatoe gchochet, wil mir sind nachher scho seeehr hungrig gsii!

Denn hemmer bsuech vo de drüü Weise bechoo. Sie hend gseit si hend eus für eusi Leistig am Morge globt gha, aber irgendwie fehlt ihne no öppis chlises. So d cherry on the top, s pünktli uf em i. Mit emne drü-phase game hemmer eus Materialie für es chliises Gschänkli erspilt. Nach em Tomaterisotto-znacht hemmer den ziit gha, drus öppis z bastle – nebe no andere Poste wie zum Biispil spile, briefchaste bastle… Und denn het eus d chuchi no mit superfeinere Vanillecreme überrascht!

Ziistig, 08.10

Nach em Zmorge het d Schildchrot eus verzelt, das mir es Buech bruuchend, zum de Hebel z repariere. Nur, das Buech isch bi de Schlange. Im Poi-Block händ mir eus drumm uf die Gfährlichi Reis zu ihne vorbereitet. Dank dem hemmer sie denn schlussendlich au gfunde und eus s Buech erdealt!

Am Namittag isch no lustiger worde: mir händ s berüemt berüchtigte Bänkligame gspilt! Am Abig sind mer denn aber scho nomal use und händ bim Fürgame, bi dems drum gaht, di gegnerische Füür uszlösche, eusi vorigi Enerigie brucht.

Mittwuch, 09.10

Mier händ müsse di magische Bauteil für de kaputti Hebel go sueche! Dafür hemmer eus uf zwei Wanderige ufteilt. Di chlinere sind go Muschle bi de Nixe hole und di grössere zu de Oktopusse s Holz go sueche. Erschöpft wie mer gsi sind hämmer drum am Abig en Ego-Easy-Abig bruch. Aber, oh nei, wo mer grad händ wölle go schlafe gah, hett en Pirat de Stock klaut!! Somit hemmer ihn i de Dunkelheit verfolge müsse! Zum Glück hämmer ihn am Schluss grad no rächtziitig gfunde und s Holz zrugggholt.

Dunnstig, 10.10

Hütt Namittag, nach em Grust-block am Morge, händ mir es neus Spiil gspilt, erfunde vom Max höchst persönlich. Bi dem händ mir müsse Zuetate für en Aktivierigs-Trank für de Hebel erspile. Die hemmer aber zerst i de verschidene Meereswelte müsse sueche. Am Abig händ mir denn no für Recht und Ordnig gsorgt und die ganze Aaklage vo de letzte Wuche mit em Lagergricht bearbeitet.

Friitig, 11.10

Am Morge hemmer, nachemne Töörlifangis zum uufwärme, es Capture the Flag im Wald gspiilt. Action puur! Und im Blinzel Extrem zum Uusstiig isch das ganze denn endgültig in e Schlammschlacht uusgartet! Siit em Mittag staht alles im Zeiche vom Abschlussabig. Dekoriere, bastle, Sirup-Drinks vorbereite, Choreos istudiere… Es git vil z tue!

Am Schluss isch den aber glich alles rächziitig parat gsi und mir händ euse Abschluss mit emne mega feine Esse, emne lustige Spiili, Herzblatt, Schoggibanane und Disco chönne fiire 😉

Samstig, 12.10

Hütt isch nur no uufrume, putze und heifahre aagstande – De Hebel isch jetzt nämlich wider vollständig und funktionstüchtig!

Mir luegend alli uf es lustigs, entspannts, cools Lager mit vilne neue Fründschafte, wo zwüsche de zwei Schaare entstande sind, zrugg! Es sind unvergesslichi Erinnerige entstande! Hoffentlich gsehnd mir eus scho glii wider und chönnd sogar irgendwenn so es Doppellager widerhole!!!